ނިއު ވޯލްޑް އޯޑާ "ޕަޕެޓް" އަށް ޑރ. ވަހީދުގެ ސަރުކާރު ވައްޓައެއް ނުލެވޭނެ!

Posted by Dhi Truth , , , , , 10:47




ނިއު ވޯލްޑް އޯޑާ އާއި ޕަޕެޓް ނަޝީދު ގުޅިގެން ދިވެހިރާއްޖޭގައި މިހާރު އުފެދިފައިވާ ޤާނޫނީ ސަރުކާރު ވައްޓާލުމަށް ކުރާ މަސައްކަތުގައި ބޭނުންކުރަމުންދަނީ ސަރުކާރު ދިފާއުކުރަން ތިބި އިސް ސްޓްރެޓަޖިސްޓުންނަށް ހިތުދަސް ކުޅިތަކެކެވެ. ނިއު ވޯލްޑް އޯޑާ ޕަޕެޓް ނަޝީދު ކުރިން ކުޅުނު ކުޅިތައް ކުޅެގެން މިހާރުގެ ސަރުކާރު ވައްޓައެއް ނުލެވޭނެއެވެ. އެހެނީ ދިވެހިރާއްޖެ މިހާރު މިއޮތީ ނިއު ވޯލްޑް އޯޑާއިން އިންޖިނިއާކޮށްގެން ހިންގި "އަރަބް ސްޕްރިންގް" ގެ ސްޓްރެޓަޖީތައް ބޭނުންކޮށްގެން ސަރުކާރު ބަދަލުކުރެވޭފަދަ ހާލަތެއްގައެއްނޫނެވެ. ދިވެހިރާއްޖެއަކީ މެދުއިރުމަތީގެ ގިނަ ގައުމުތަކާއި އަދި ޗައިނާ އާއި ރަޝިޔާއާއި ހިލާފަށް ބާރުތައް ވަކިކުރެވިފައިވާ މަލްޓި ޕާޓީ ޑިމޮކްރަސީއެއް އޮތް ގައުމެކެވެ.

"އަރަބް ސްޕްރިންގް" ގެ ކުރިން ނިއު ވޯލްޑް އޯޑާއިން އެމީހުންގެ ހަގީގަތް ހާމަކުރާ އަދި އެމީހުން ނުރުހޭ ސަރުކާރުތައް ބަދަލުކުރުމަށް ބޭނުންކުރި ސްޓްރެޓަޖީތަކެއްވެސް ރާއްޖެއަކު ނުހިނގާނެއެވެ. ރާއްޖެއާއި ދެކޮޅަށް އެސްޓްރެޓަޖީތައް ބޭނުންކުރިއަސް ރާއްޖެއަކީ "ރޯގް" ސްޓޭޓެއްގެ ގޮތުގައި ބޭރު ދުނިޔެއަަކަށް ނުވިއްކޭނެއެވެ. އަދި ރާއްޖެއަކީ ޑިކްޓޭޓާޝިޕެއް އޮތް ގައުމެއްކަމަށްވެސް ދުނިޔެއަކަށް ދެނެއް ނުވިއްކޭނެއެވެ.

ދުނިޔޭގެ ގައުމުތަކުގެ ސަރުކާރުތައް ބަދަލުކުރުމަށް ނިއު ވޯލްޑް އޯޑާއިން ބޭނުންކޮށްފައިވާ ސްޓްރެޓަޖީތައް ދިރާސާކުރުމުން ފާހަގަކުރެވޭ ސީކުއެންސް ކިޔުންތެރިންނާއި ހިއްސާކޮށްލާނަމެވެ.
  1. ނިއު ވޯލްޑް އޯޑާ އެލީޓުން ގައުމެއްގެ ސަރުކާރު ބަދަލުކުރަން ބޭނުންވެއްޖެނަމަ އެންމެ ފުރަތަމަވެސް އެގައުމަކީ "ރޯގް" ސްޓޭޓް އެއްގެ ގޮތުގައި ލޭބަލްކުރެއެވެ. "ރޯގް" ސްޓޭޓެއްގެ ގޮތުގައި ހުޅަނގުގެ މެއިންސްޓްރީމް މީޑިއާތަކުން ގައުމެއް ލޭބަލްކޮށްފިނަމަ އޭގެ އަލްޓިމޭޓް ބޭނުމަކީ އެގައުމެއްގެ ސަރުކާރު ބަދަލުކުރުމެވެ.
  2. "ރޯގް ސްޓޭޓް" އެއްގެ ގޮތުގައި ނިއު ވޯލްޑް އޯޑާ އެލީޓުން ގައުމެއް ލޭބަލްކޮށްފިނަމަ އެގައުމެއްގައި އުޅޭ ސަރުކާރާއި އިދިކޮޅު އެކިއެކިި ގްރޫޕްތަކަށް މާލީ އެހީއާއި ތަމްރީނުތައް އަދި ބައެއްފަހަރު ހަތިޔާރުވެސް ފޯރުކޮށްދީގެން އެގައުމެއް ދާހިލީ ހަމަނުޖެހުމެއްގެ ތެރެއަށް ވައްޓާލައެވެ. މި މަސައްކަތް ކުރިއަށްގެންދަނީ ސީއައިއޭ، އެމްއައިސިކްސް، މޮސާދް، އަދި ސީއައިއޭގެ އުފެއްދުމެއްކަމުގައިވާ އަލް ގައިދާ އަދި އެކިއެކި ޑްރަގް ކާޓެލްސް މެދުވެރިކޮށްގެންނެވެ. އަދި މިމަރުހަލާގައި ނިއު ވޯލްޑް އޯޑާއިން ބަދަލުކުރަން ބޭނުންވާ ސަރުކާރަކާއި އިދިކޮޅަށް މަސައްކަތްކުރާ ގްރޫޕްތަކަކީ ފްރީޑަމް ފައިޓާސް، ހިއުމަން ރައިޓްސް އެކްޓިވިސްޓްސް ކަމުގައި ލޭބަލްކޮށް އިޝްތިހާރު ކުރެއެވެ.
  3.  ތިންވަނަ މަރުހަލާގައި އެގައުމެއްގެ ރައްޔިތުން ހިމާޔަތްކުރަން ކަމަށްބުނެ، އެހެންނަމަވެސް ހުޅަނގުގެ ބާރުތަކުން އެގައުމަކަށް އަރައި އެގައުމެއްގެ ރައްޔިތުން ކަތިލުމަށް މަގުފަހިވާގޮތަށް އދ. ގެ ސެކިއުރިޓީ ކައުންސިލް މެދުވެރިކޮށް ރިސޮލިއުޝަންތައް ފާސްކުރެއެވެ.
  4. އެގައުމަކާއި ދެކޮޅަށް އދ. ގެ ރިސޮލިއުޝަން ފާސްކުރާ މަރުހަލާގައި މުޅި ދުނިޔޭގެ މެއިންސްޓްރީމް މީޑިއާ އޮންނާނީ އެގައުމާއި އިދިކޮޅަށް މެކުހަށް ޖަހާފައެވެ. އެގައުމާއި ގުޅުވައިގެން މީޑިއާގައި ފަތުރާ ގިނަ ވާހަކަތަކުގައި އަބަދުވެސް ބުނަމުންދާނީ އެމީޑިއާތަކުން ހާމަކުރަމުންދަނީ އިންޓަނޭޝަނަލް ކޮމިއުނިޓީގެ ކަންބޮޑުވުންތައް ކަމުގައެވެ.
  5. ދެން އޮންނަ މަރުހަލާއަކީ އެގައުމަކަށް ބޮން އަޅައި، އެގައުމަކަށް އަރައި މުޅި ގައުމުގެ ރައްޔިތުންނާއި ވަސީލަތްތައް ކޮންޓްރޯލްކުރުމެވެ. އަދި އެއަށްފަހު އެއީ "ލިބަރޭޝަން" ކަމުގައި ބުނެއެވެ.
  6. ނިއު ވޯލްޑް އޯޑާ އެލީޓުންގެ ޓާގެޓް ގައުމު އެމީހުންގެ ފުލް ކޮންޓްރޯލްގެ ދަށަށް ދިއުމުން ދެން އެގައުމެއްގައި އެމީހުން ބޭނުންވާފަދަ ޑިމޮކްރަސީއެއް ނުވަތަ އެމީހުންގެ ޕަޕަޓެއްގެ ވެރިކަމެއް ގާއިމުކުރެއެވެ.
  7. އެންމެ ފަހު މަރުހަލާއަކީ އެގައުމުގެ ގުދުރަތީ ވަސީލަތްތަކުގެ ފައިދާ ހޯދުމެވެ. އެގައުމުގެ ގުދުރަތީ ވަސީލަތްތަކާއި، ހަރުމުދާތަކާއި ދައުލަތުގެ ވިޔަފާރިތައް ޕްރައިވަޓައިޒޭޝަން އަދި ފޮރިން އިންވެސްޓްމެންޓްގެ ނަމުގައި ގްލޯބަލް ކޯޕަރޭޝަންތަކާއި ވިޔަފާރިތަކަށް ހުޅުވާލުމަކީ ހަގީގަތުގައި ސަރުކާރު ބަދަލުކުރަން ބޭނުންވާ ހަގީގީ މަގްސަދެވެ. ޑިމޮކްރަސީ އެއީ ސަރުކާރު ބަދަލުކުރުމަށް ދައްކާ ބަހަނާއެކެވެ.

މަތީގައިވާ ސްޓްރެޓަޖީތައް ބޭނުންކޮށްގެން ގައުމުތަކުގެ ސަރުކާރުތައް ވައްޓާލެވިފައިވަނީ އެގައުމުތަކުގައި އުޅޭ މުނާފިގުންގެ ގްރޫޕްތަކުންވެސް ނިއު ވޯލްޑް އޯޑާއަށް މަދަދުވެރިވެފައިވާތީއެވެ. "ފްރީޑަމް"، "ޑިމޮކްރަސީ"، "ޕީސް"، އަދި "ހިއުމަން ރައިޓްސް" ގެ ނަމުގައި ގައުމުތައް ފުނޑުފުނޑުކޮށްލެވިފަވަނީ އެގައުމަށް އުފަން "މުނާފިގުން" އަދި "ބާޣީން" ގެ އެހީތެރިކަމާއެކުއެވެ.

ރާއްޖޭގައިވެސް މިފަދަ "މުނާފިގުން" އަދި "ބާޢީން" އެބަތިއްބެވެ. އެމީހުންނަކީ ކޮބާކަން އެމްޑީޕީ ނޫން އެހެން ހުރިހާ ޕާޓީއެއްގެ މެމްބަރުންނަށާއި ދިވެހިރައްޔިތުންނަށް އެނގޭނެއެވެ. އެ މުނާފިގުންގެ ގްރޫޕުން ވަނީ މީގެ ކުރީގައި ނިއު ވޯލްޑް އޯޑާއަށް ބައިއަތު ހިފައިގެން ރާއްޖެއަކީ ޑިކްޓޭޓާޝިޕެއްކަމަށް ދުނިޔެއަށް ލޭބަލްކޮށްފައެވެ. އެ މުނާފިގު ބާޣީ ގްރޫޕުން ވަނީ ނިއު ވޯލްޑް އޯޑާގެ އެހީގައި ސާބިޔާގެ ކެންވަސް ޖަމާއަތާއި، އެހެނިހެން ޖަމާއަތުން ތަމްރީނު ހޯދާފައެވެ. އެ މުނާފިގު އަދި ބާޣީ ގްރޫޕުން ވަނީ ނިއު ވޯލްޑް އޯޑާގެ މާލީ އެހީތެރިކަންވެސް ހޯދާފައެވެ. އެ މުނާފިގު އަދި ބާޣީ ގްރޫޕުން ވަނީ ނިއު ވޯލްޑް އޯޑާ ބޭނުންވާގޮތަށް ރާއްޖޭގައި ސެކިއުލާ ދައުލަތެއް އުފެއްދުމަށް އުޅެފައެވެ. އަދި އެގްރޫޕުންވަނީ ނިއު ވޯލްޑް އޯޑާ ޕެޕެޓެއް ރާއްޖޭގެ ވެރިކަމަށް ހޮވުމަށްފަހު ރާއްޖެ ހުޅަނގަށް ވިއްކާލައި ދިވެހިރާއްޖެއަކީ ނިއު ވޯލްޑް އޯޑާގެ އަޅު ގައުމަކަށް ހަދާފައެވެ.

އެހެންނަމަވެސް، އެހެންނަމަވެސް ދިވެހިން އަލުން އަނބުރާ ވެރިކަން ހޯދާފައިވަނީ ޒަޔަނިސްޓުންނަށް ގޮންޖަހާފައެވެ. ނިއު ވޯލްޑް އޯޑާ ޒަޔަނިސްޓުން ދިވެހިން އަންޑާމައިން ކުރުމުގެ ނަތީޖާ އެމީހުންނަށް މިއަދު ވަނީ ފެނިފައެވެ. ނިއު ވޯލްޑް އޯޑާ ޕަޕެޓްގެ ވެރިކަން ބަދަލުކޮށްލީގޮތުން އަދި ޑރ. ވަހީދުގެ ވެރިކަން ދިފާއުކޮށްފައިވާގޮތުން އަދި ދަމަހައްޓަމުން އަންނަގޮތުން "މުނާފިގު ބާޣީ" ޕަޕެޓުންނަށްވުރެ ތައުލީމީ، ވިސްނުންތޫނު އަދި ކުޅަދާނަ ސްޓްރެޓަޖިސްޓުން ރާއްޖޭގައި އެބަތިބިކަން އެމީހުންނަށް މިހާރު ވާނީ ހާމަވެފައެވެ.

އެހެންކަމުން ކުރިން ކުޅުނު ކުޅިތައް ކުޅެގެން މިހާރުގެ ވެރިކަން ވައްޓަލެއް ނުލެވޭނެއެވެ. ނިއު ވޯލްޑް އޯޑާއިން އެމީހުންގެ ޕަޕެޓް ކިތަންމެ ވަރަކަށް މުޅި ދުނިޔޭގައި މަޝްހޫރުކުރިޔަސް، އަދި އަރިއަރިއަށް ފޮޓޯނަގަނަގާފައި ދިވެހި ފުލުހުންނާއި ސިފައިންނަކީ އަނިޔާވެރިންކަމުގައި ލޭބަލްކުރަން އުޅުނަސް، އަދި ދިވެހިންގެ ދޮގު ބަޔާންތައް ބޭރުގެ ޖަމްއިއްޔާތަކަށް ފޮނުވިޔަސް ރާއްޖޭގައި އޮތީ "ރޯގް ސްޓޭޓް" އެއް ނުވަތަ "ޑިކްޓޭޓާޝިޕެއް" ނުވަތަ "އިލެޖިޓިމޭޓް" ސަރުކާރަކަށް ނުހެދޭނެއެވެ. ނިއު ވޯލްޑް އޯޑާ ޕަޕެޓް ކިތަންމެ ބޭނުންވިޔަސް ދިވެހިންގެ މާސް ޕޮޕިއުލޭޝަން މިސަރުކާރާއި ދެކޮޅަކަށް ނުނެރެވޭނެއެވެ. އަނެއްކޮޅުން ޗައިނާގެ ތާއިދާއި ނުލައި އދ. ގެ ސެކިއުރިޓީ ކައުންސިލްގައި ރާއްޖެއާއި ދެކޮޅަކަށް ރިސޮލިއުޝަނެއް ފާހެއް ނުކުރެވޭނެއެވެ. ވީމާ ރާއްޖޭގެ ސަރުކާރު ބަދަލުކުރަން ކުރީގައި ބޭނުންކުރި ސްޓްރެޓަޖީތަކެއް ނުހިނގާނެއެވެ. ރާއްޖޭގައި "އަރަބް ސްޕްރިންގް" ފަދަ އިންގިލާބެއްވެސް ނުޖެއްސޭނެއެވެ.

Posted by Dhi Truth on 10:47. Filed under , , , , , . You can follow any responses to this entry through the RSS 2.0

ފަހުގެ ޚަބަރުތައް

FLICKR PHOTO STREAM

2010 Dhi Truth. All Rights Reserved. - Designed by Dhi Truth