މަޖިލިސް ހުއްޓުވުމުގެ ހައްގެއް އެއްވެސް މެންބަރަކަށް ނޯންނާނެ: އައިޕީޔޫ
breakingnews, didyouknow, entertainment, feature, gallery, maldives, news, politics, world 21:50
 |
| އައިޕީޔޫގެ ޑިރެކްޓަ އޮފް ޕްރޮގްރާމްސް މާޓިން ޗުންގޮންގް (ވ) މިއަދު ނޫސްވެރިންނާ ވާހަކަދައްކަވަނީ.--ހަވީރު ފޮޓޯ: ނަސްރުﷲ ސޯލިހު |
ރައްޔިތުންގެ މަޖިލީހުގެ މަސައްކަތަށް ހުރަސް އަޅައި މަޖިލިސް ހުއްޓުވުމުގެ ހައްގެއް އެއްވެސް މެމްބަރަކަށް ނޯންނާނެ ކަމަށް އިންޓަ-ޕާލަމެންޓްރީ ޔޫނިއަން (އައިޕީޔޫ) އިން މިއަދު ބުނެފި އެވެ.
ރާއްޖޭގައި އުފެދިފައިވާ ސިޔާސީ މައްސަލަތަކުގެ ތެރެއިން ރައްޔިތުންގެ މަޖިލިސް މިއަހަރަށް ހުޅުވިޔަނުދީ، އެމްޑީޕީން އެކަމަށް ހުރަސްއަޅަމުން ދާތީ، މަޖިލިސް ހުޅުވުމާ ގުޅޭ ގޮތުން ސިޔާސީ ފަރާތްތަކާ އެކު ވާހަކަ ދެއްކުމަށް ރާއްޖެ އައިސް އުޅޭ އައިޕީޔޫގެ ވަފްދުން ބުނީ ރައްޔިތުންގެ މަޖިލީހުގެ މަސައްކަތް އާންމު އުސޫލުގެ މަތިން ހިނގަންޖެހޭނެ ކަމަށް ގަބޫލުކުރާ ކަމަށެވެ.
ރާއްޖެ އަށް ކުރައްވަމުން ގެންދަވާ ޒިޔާރަތާ ބެހޭ ގޮތުން ނޫސްވެރިންނަށް މައުލޫމާތު ދެއްވަމުން އައިޕީޔޫގެ ޑިރެކްޓަ އޮފް ޕްރޮގްރާމްސް މާޓިން ޗުންގޮންގް ވިދާޅުވީ ސިޔާސީ ފަރާތްތަކާ އެކު ކުރަމުންދާ މަޝްވަރާތަކުގެ ނަތީޖާއަކާ މެދު އެއްޗެއް ވިދާޅުވާން ދަތި ކަމަށެވެ. ނަމަވެސް އެ ވާހަކަތަކުން މިހާތަނަށް ނަތީޖާއެއް ނެރުވުނު ކަމަކަށް ވިދާޅެއްނުވެ އެވެ.
"އަޅުގަނޑުމެން ބޭނުންވަނީ އާންމު އުސޫލުގެ މަތިން ރައްޔިތުންގެ މަޖިލިސް ހުޅުވިގެން ހިނގަމުން ދިއުން. މަޖިލީހަކީ އާންމު ރައްޔިތުން އިންތިޚާބުކޮށްފައިވާ މެންބަރުން ތަމްސީލުކުރާ ތަނަކަށް ވާތީ، މަޖިލިސް ހިނގުމުގެ ފުރުސަތު އޮންނަންވާނެ. މަޖިލިސް ހުއްޓުވުމުގެ ހައްގެއް އެއްވެސް މީހަކަށް ނޯންނާނެ. ޑިމޮކްރެޓިކް ބަހުސްތައް ކުރެވޭ ތަނެއްގެ ގޮތުގައި މަޖިލިސް ހިނގައިގަތުމަށްޓަކައި ހުރިހާ ފަރާތްތަކުން ވެސް ދޫދީގެން އެންމެނަށް އެއްބަސްވެވޭ ގޮތަކަށް މައްސަލަ ހައްލުކުރެވޭނެ ކަމަށް އަހަރެމެން އުންމީދުކުރަން،" ޗުންގޮންގް ވިދާޅުވި އެވެ.
އޭނާ ވިދާޅުވީ ސަލާމަތީ ބާރުތަކުގެ ބޭނުންކޮށްގެން މަޖިލީހުގެ މާލަމުން މެމްބަރުގެ ނެރުމާ މެދު ގޮތެއް ނިންމާނީ ކަމާބެހޭ އިދާރާތަކުން ކަމަށެވެ.
"ސަލާމަތީ ބާރުތަކުގެ ބޭނުންކޮށްގެން މަޖިލީހުގެ މާލަމުން މެމްބަރުގެ ނެރުމުގެ ބާރު މަޖިލީހުގެ ރައީސަށް ލިބިދީފައިވާ އިރު، އެއީ ސިޔާސީ ގޮތުން އެންމެ ރަނގަޅު ގޮތް ކަމެއް އަޅުގަނޑުމެންނަކަށް ނޭނގެ. އެކަމާ މެދު ގޮތެއް ނިންމާނީ ދިވެހި ދައުލަތުގެ ކަމާބެހޭ އިދާރާތަކުން،" ޗުންގޮންގް ވިދާޅުވި އެވެ.
ޗުންގޮންގް ވިދާޅުވި ގޮތުގައި އައިޕީޔޫގެ ވަފްދު ރާއްޖެ އައީ ދިވެހީންގެ މައްޗަށް އެއްވެސް ކަމެއް ލާޒިމްކުރަން ނޫން ކަމަށާއި ހަމައެކަނި ސިޔާސީ ވާހަކަތަކަށް މަގުފަހިކޮށްދޭ ބައެއްގެ ގޮތުގައި ކަމަށެވެ. އަދި މަޖިލިސް އަލުން ހިނގައިގަތުމާ ގުޅޭ ގޮތުން ގޮތެއް ނިންމާނީ ކަމާ ބެހޭ ފަރާތްތަކުގެ މެދުގައި އެއްބަސްވެވޭ ގޮތެއްގެ މަތިން ކަމަށް ވެސް އޭނާ ވިދާޅުވި އެވެ.
ޗުންގޮންގް ވިދާޅުވީ މިހާރު ވެސް ޕާޓީތަކާ އެކު ވާހަކަތައް ދެކެވެމުން ދާތީ އާއި މާދަމާ ވެސް ވާހަކަތައް ދެއްކުން އޮތަތީ، ޕާޓީތަކަށް އެއްބަސްވުމަކަށް ނާދެވުނު ކަމަށް ނުބުނެވޭނެ ކަމަށެވެ. ނަމަވެސް އޭނާ ތަކުރާރުކޮށް ވިދާޅުވީ މަޖިލީހުގެ މަސައްކަތް ހިނގައިގަތުން މުހިންމު ކަމަށެވެ.
މި އަހަރަށް ރައްޔިތުންގެ މަޖިލިސް ހުޅުވުމަށް މި މަހުގެ ފުރަތަމަ ދުވަހު ބާއްވަން އުޅުނު ޖަލްސާ ބޭއްވޭ ގޮތް ނުވީ، ރައީސް މުހައްމަދު ވަހީދު މަޖިލީހަށް ވަނުމަށް އެމްޑީޕީން ހުރަސްއަޅައި މަޖިލީހުގެ ރައީސް އަބްދުﷲ ޝާހިދު ވެސް މަޖިލީހުގެ މާލަމަށް ވަދެވަޑައިގަތުމަށް ފުރުސަތު ނުދިނުމުންނެވެ. އޭގެ ފަހުން މާދަމާ މަޖިލީހުގެ މި އަހަރުގެ ފުރަތަމަ ޖަލްސާ ބާއްވަން އެޖެންޑާކޮށްފައިވާ އިރު، އެމްޑީޕީން މިއަދު ހަވީރު ވަނީ، ރައީސް ވަހީދު މަޖިލީހަށް ވަދެވަޑައިގަތުމުގެ ފުރުސަތު ނުދިނުމަށް ފާސްކޮށްފަ އެވެ.
Posted by Dhi Truth
on 21:50.
Filed under
breakingnews,
didyouknow,
entertainment,
feature,
gallery,
maldives,
news,
politics,
world
.
You can follow any responses to this entry through the RSS 2.0
