ވަކި ޕާޓީއެއްގެ މަސްލަހަތު ކުރިއަރުވާކަން ކޮމަންވެލްތު ބަޔާނުން ފެނޭ: ސަރުކާރު
breakingnews, didyouknow, feature, gallery, maldives, politics 12:37
 |
| ރާއްޖޭގައި އަވަސް އިންތިހާބެއް ބޭއްވުމާ މެދު އެކަށީގެންވާ ކުރިއެރުމެއް ލިބިފައި ނުވާތީ ކޮމަންވެލްތު މިނިސްޓީރިއަލް އެކްޝަން ގުރޫޕް (ސީމެގް) އިން ނެރުނު ބަޔާނުގައި ވަކި ޕާޓީއެއްގެ ނުވަތަ "ވަކި އިންސާނެއްގެ" މަސްލަހަތު ކުރިއަރުވާތަން ފެންނަ ކަމަށް ދިވެހި ސަރުކާރުން މިއަދު ބުނެފި އެވެ. ރާއްޖޭގެ ސިޔާސީ މަސްރަހުގެ ކަންކަން ބެލުމަށް ފަހު ކޮމަންވެލްތުން ނެރުނު ބަޔާނާ ބެހޭ ގޮތުން ނޫސްވެރިންނާ ވާހަކަ ދައްކަވަމުން ފޮރިން މިނިސްޓްރީގެ ސްޓޭޓް މިނިސްޓަރު ދުންޔާ މައުމޫން ވިދާޅުވީ، އަވަސް އިންތިހާބެއްގެ މައްސަލަ އާއި ވެރިކަން ބަދަލުކުރި ގޮތް ބެލުމަށް އުފައްދާފައިވާ އިންކުއަރީ ކޮމިޝަނަށް ސިޔާސީ ޕާޓީތަކުގެ އެއްބާރުލުން ނުލިބޭ ކަމަށް ސީމެގުން ފާހަގަ ކޮށްފައިވާތީ ސަރުކާރުން ކަންބޮޑުވާ ކަމަށެވެ. "ކޮންމެވެސް ވަރަކަށް ވަކި ޕާޓީއެއްގެ މަސްލަހަތު ނުވަތަ ވަކި އިންސާނެއްގެ މަސްލަހަތު ކުރިއަރުވާ ތަން އެއިން އެބަ ފެނޭ. އެކަމަކު މުޅިއަކުން އެހެނެއް ދަންނަވާކަށް ބޭނުމެއް ނޫން. އެއީ އޭގައި އެބަހުރި ސަރުކާރަށް ވަރަށް ޕޮޒިޓިވްކޮށް ގެންނަވާފައި ހުރި ބައިވަރު ކަންތައްތައް ވެސް. މީގެ ތެރޭގައި އޯލް ޕާޓީ ޓޯކްސްއެއް ކުރިއަށް ގެންދިއުމުގެ އިނީޝިއޭޓިވްއާ މި ކަހަލަ ކަންތައްތައް އެބަހުރި ފާހަގަ ކުރައްވާފައި. ދެން އަނެއްކާ މަޖިލިސް ކުރިއަށް ނުގެންދިއުމުން އެކަމާ ކޮންސާން އެކްސްޕްރެސް ކުރައްވާފައި އެބަހުރި. އަދި 1 މާޗުގައި ވެސް ސްޓޭޓްމަންޓެއް ނެރުއްވި. އޭގައި ވެސް ވަރަށް ބޮޑަށް ކަންބޮޑުވުން ފާޅުކުރެއްވި. އެހެންވީމަ އަޅުގަނޑު ދަންނަވާނީ މި ސަރުކާރުގެ މަސައްކަތަށް ވަރަށް ބޮޑު ސަޕޯޓެއް ދެއްވާފައި އެބައޮތޭ،" ދުންޔާ ވިދާޅުވި އެވެ. އޭނާ ވިދާޅުވީ، ކުރީގެ ރައީސް މުހަންމަދު ނަޝީދުގެ ވެރިކަން ބަދަލުވެ އޭރުގެ ނާއިބު ރައީސް ޑރ. މުހަންމަދު ވަހީދު ހަސަން މަނިކު ވެރިކަމާ ހަވާލުވެ ވަޑައިގަތީ ގާނޫނު އަސާސީގައިވާ ގޮތުގެ މަތިން ކަމަށެވެ. އެހެން ނަމަވެސް އަވަސް އިންތިހާބެއް ބާއްވާނެ ތާރީހެއް ހޯދުމަށް ކޮމަންވެލްތުން މާ ބޮޑަށް ހިފަހައްޓައިގެން އުޅޭތީ ހައިރާންވާ ކަމަށް ދުންޔާ ވިދާޅުވި އެވެ. އޭނާ ވިދާޅުވީ، އަވަސް އިންތިހާބެއް ބޭއްވުމުގެ މަޝްވަރާ އަށް ދާން ސަރުކާރު ތައްޔާރު ކަމަށެވެ. އެހެން ނަމަވެސް ގާނޫނު އަސާސީ އަށް ބަދަލުތަކެއް ގެންނަން ޖެހޭތީ ރައްޔިތުންގެ މަޖިލީހުގެ ތެރެއިން ހައްލެއް ހޯދަން ޖެހޭ ކަމަށް ދުންޔާ ވިދާޅުވި އެވެ. އޭނާ ވިދާޅުވީ، އަވަސް އިންތިހާބެއްގެ ކުރިން އެތައް ފިޔަވަޅެއް އަޅަންޖެހޭ ކަމަށެވެ. "އަޅުގަނޑުމެން ޖެހޭ ސުލްހަވެރި އަދި އަމާން މާހައުލެއް ބިނާކުރަން. އަދި އަޅުގަނޑުމެންގެ މުއައްސަސާތަކަކީ ވަކި ފަރާތަކަށް ނުޖެހި ވަރަށް ހަރުދަނާކޮށް މަސައްކަތްކުރާ މުއައްސަސާތަކަކަށް އިތުރަށް ހަދަން. އެހެން ނޫން ކަމަށްވާ ނަމަ މާ އަވަހަށް އިލެކްޝަނަކަށް ގޮސް، ރާއްޖޭގެ ހާލަތު މިހާރު އޮތް ވަރަށް ވުރެ އިތުރަށް ގޯސްވާނެ ކަމަށް އަޅުގަނޑުމެންގެ ޝައްކެއް ނެތޭ. މިހާރު ވެސް މި އޮތީ ވަރަށް ބޮޑަށް ބައިބައިވެފައި. އިތުރަށް އިލެކްޝަނެއް އައިސް އެއް ބަޔަކު [އިންތިހާބު] ގަބޫލު ނުކުރިޔަސް އަޅުގަނޑަށް ހީވަނީ ރާއްޖޭގެ ހާލަތު ހަނގުރާމަ އަކަށް ދިއުމަކީ ނުވާނެ ކަމެކޭ ވެސް ނުބުނެވޭނެ. އަޅުގަނޑުމެން އެއްގޮތަކަށް ވެސް ނޭދެން މިކަހަލަ މަންޒަރެއް ރާއްޖޭގައި ފެންނާކަށް،" ދުންޔާ ވިދާޅުވި އެވެ. އޭނާ ވިދާޅުވީ، ރާއްޖޭގެ ސިޔާސީ މަސްރަހާ މެދު ކޮމަންވެލްތު ފިޔަވައި އެހެން ޖަމާއަތްތަކުން ކަންބޮޑުވުން ފާޅުނުކުރާ ކަމަށެވެ. އަދި ރާއްޖޭގެ މައްސަލަތަކުގެ ހަގީގަތް އެކި ގައުމުތަކަށް އެނގޭ ވަރަކުން އެ ގައުމުތަކުން ސަރުކާރުގެ ވާހަކަތައް ގަބޫލުކުރާ ކަމަށެވެ. އަދި ދުނިޔޭގެ ފެންވަރުގައި ބަލާއިރު ރާއްޖޭގެ ސިޔާސީ މަސްރަހާ މެދު ގައުމުތަކުން ކަންބޮޑުވުން ފާޅުނުކުރާ ކަމަށް ދުންޔާ ވިދާޅުވި އެވެ. "އަޅުގަނޑުގެ އުންމީދަކީ އދ. ވެސް އަދި އެހެން އަވައްޓެރި ގައުމުތަކުން ވެސް މިކަމާ އެހީތެރިވެ ދެއްވުން ސަރުކާރުގެ ރިކްއެސްޓަށް. ކޮންމެހެން އެ ބޭފުޅުން ބޭނުން ގޮތްތަކެއް އަޅުގަނޑުމެންނަށް އިމްޕޯސް ކުރެއްވުމެއް ނޫން،" ދުންޔާ ވިދާޅުވި އެވެ. އޭނާ ވިދާޅުވީ، މިހާރު ރާއްޖެ ވަޑައިގެން އުޅުއްވާ ކޮމަންވެލްތުގެ މަންދޫބު ޑޮން މެކިނަން އަށް ސަރުކާރުން އެއްބާރުލުން ދޭނެ ކަމަށެވެ. އަދި ކޮމަންވެލްތުން އެންމެ ފަހުން ނެރުނު ބަޔާނަށް ވެސް ސަރުކާރުން ވަނީ މަރުހަބާ ކިޔައިފަ އެވެ. |
Posted by Dhi Truth
on 12:37.
Filed under
breakingnews,
didyouknow,
feature,
gallery,
maldives,
politics
.
You can follow any responses to this entry through the RSS 2.0
